La pruma braba
No die de San Martino, tapa l tou bino I pon-te a mal cun l tou bezino.
L saber de l pobo ye muitas vezes çpreziado. Un çprézio que resulta, antre outras causas, de la guerra antre ua cultura chamada lhetrada i outra chamada analfabeta. Imbora las frunteiras desta lhuita puodan ser dúbias, la berdade ye que se dá por subantendido que solo quien sabe ler i screbir ye berdadeiramente capaç de comunicar sentimientos, eideias ou, se quejirmos, de criar cultura. La cibilizaçon de la scrita fizo de l saber ua cousa que se merca i, cumo tal, sujeita a ser amuntonada. Sabe mais quien apedurou mais diplomas i quien angulhiu mais lhetras. Este comiduro, indas que stribado no reconhecimiento social, puxa para ser un procedimiento altamente andebidualista i, cumo tal, causador d’elites. L domínio de la scrita fui-se amponendo, deixando de fuora aqueilhes que nun podien daprender indo a la scola. Antre ls que quedórun mais tiempo n’umbreira desse santuário stan las classes rurales i, drento deilhas, las mulhieres que, pul cuntrairo, son las grandes tulhas de l saber oural.
Mas nien siempre assi fui. La chamada cibilizaçon oucidental fizo-se i medrou n’antendimiento antre la chamada cultura popular i la cultura eirudita.
Assi i todo, a partir d’ua cierta era, que storicamente se puode poner an finales de l’Eidade Média, fúrun-se apartando ua de l’outra. Assi se fui scabando la fóia antre l’ouralidade i la scrita, dues formas de spresson que, a bien dezir, nacírun armanas i armanadas. D’un lhado quedou l pobo, analfabeto, de l outro, las classes faborecidas, que ténen antrada no capielha de la cultura porque domínan las técnicas de la scrita.
Ls lhaços de la scrita cun ls balores mágico-religiosos i, por isso, cun ls balores socioculturales d’alto prestígio, ténen raízes mui fondas an bárias cibilizaçones, mas subretodo na cibilizaçon judaico-cristiana, na qual la Bíblia representa un papel primacial.
A esta berdade, einegable, podemos assi i todo cuntraponer que l próprio Cristo rebelou las sues berdades diretamento. Nun l fizo por scrito porque la palabra, nun amponendo nien oubrigando a la transcriçon, stá mais próssima de l coraçon.
Outro eisemplo desta bezinança antre la palabra i l ato, no mundo judaico-crestiano, ye la cunfisson, stribada na prática ouricular drento d’ua teologie cun ls alheçaces stribados na scrita.
Assi i todo, de diferentes maneiras i an diferentes campos, l’ouralidade rejistiu al domínio de la scrita. L ansino, ls sermones, ls teçtemunhos judiciales, son alguns eisemplos de cumo la prática oural se manten biba nas nuossas sociedades oucidentales. La rapideç i la prefundidade de la relaçon fázen de la palabra ua cundiçon de la sue eificácia.
Por outro lhado, la gramática de l’ouralidade ten códigos deficilmente transponibles pa la scrita. Un deilhes ye l’antonaçon que ningun sistema de scrita fui capaç de reproduzir. Assi, por mais amportante que la çcubierta de la scrita tenga sido pa l çtino de l’houmanidade – ou parte deilha – eilha tamien fizo calhar la prática biba de la palabra.
Quando se fala sien ler, l’outeridade resulta de la boç. Mas quando se lei essa outeridade queda no papel. Por isso, las cibilizaçones d’ouralidade reconhécen la fuorça de la palabra, tal cumo las cibilizaçones de tradiçin scrita reconhécen la fuorça de l testo.
Bénen estas cunsideraçones a propósito de ls muitos ditos i adaiges que, por esta altura se dízen de San Martino. Las chamadas “formas fixas” – ditos, adaiges, ditos dezideiros, adabinas i tamien cantigas – son produçones coletibas que se cunsérban na memória, an muitas bariantes i anfenitas repetiçones. Pudíssen, pois, estas cunsideraçones serbir para çpertar la buntade i dar ganas d’ir a saber dalguas destas formas. Un saber de l pobo que prometemos traer, an forma crónica, pa la semana que ben.
