La pruma braba
De l Natal al Antruido hai un més cachaporrudo.
Adaige mirandés
Por estes dies chega la Quaresma. Nun sei an quei ye que las pessonas pénsan quando ouben la palabra, mas eilha quier dezir “quarenta”, ua beç que ben de l lhatin “quadragesima”. Pa l’Eigreija Católica, esta palabra refiere-se al tiempo de l grande aiuno i penitença qu’ampeça na Quarta de Cinzas i dura até la Quinta-feira santa.
I ye por falar an Quaresma que me lhembra desta pequeinha cunta que mos fala dessa anterdiçon de comer chicha:
Era ua beç ua tie que se fui a cunfessar pu l’altura de la Quaresma. I l cura siempre le dixo que nun podie comer carne. I eilha diç-le assi:
- Á senhor cura, mas la chcicha que stá no meio de ls dientes puode-se comer ou nó?
L cura, claro, dixo-le que si.
Bai eilha, chega a casa, pegou no sedeiro i anchiu-lo de chicha no meio de ls dientes. I assi comiu chicha durante toda Quaresma.
L anterdito i l miedo ténen, na cultura popular, i na lhiteratrura oural an particular, muitas respuostas. La risa ye ua deilhas. Outra puode ser la manha ou la maneira cumo s’anganha. Eiqui queda mais un pequeinho eisemplo, noutra cunta qu’oubi an Freixenosa de la boca de tie Clementina Rosa Afonso.
Outra beç outro cura fui-se un a cunfessar i diç-le assi l cura para el:
- O senhor tem então muitos pecados não é assim?
- Não senhor padre, eu só tenho um que roubei um porco o outro dia.
(Porque antes andában ls cochinos pu la rue…)
I apuis diç-le anton el:
- Roubei un cochino.
- Isso é muito pecado, mas olhe, vai-me a trazer dinheiro para ua missa para as almas i apois ficas absolbido.
Quedou todo cuntento, fui a casa, agarrou anton dieç scudos ou bintes scudos i alhá fui i anton dou-le l denheiro.
L cura chegou a casa diç-le pa la criada:
- Toma alhá, bai a comprar ua galinha.
- I anton…?
- Foi-se un a confessar diç que tenie roubado esse denheiro.
- Cumo nun fosse o nosso que já dois dias que nun ben a casa!
L outro fui a casa, agarrou assi un cacho de chicha an riba de l pan i l cura staba na baranda i el fui assi a comer an frente de l ura, a comer la chicha, i diç-le l cura:
- Come, come meu lambão, qu’esse ben barato te saiu!
I diç-le el:
- O senhor é que le pôs o preço!
