La pruma braba
“I al chegar al de l ‘creio na ressurreiçon de carne i la bida eiterna’, la boç de Don Manuel afogába-se, cumo nua lhagona, na de l pobo todo, i era el que se calhaba”.
Miguel de Unamuno, San Miguel Bueno, mártir
L lhodo i las streilhas (O lodo e as estrelas) de Telmo Ferraz ye un de ls lhibros que todos habien de ler. Talbeç el nun entre propiamente nos cánones de la lhiteratura ounibersal. Mas stou cierto de que ten lhugar na prateleira de ls houmildes i de ls homes, aqueilhes que, cumo dirie Unamuno, nun son mais que l’anchura de las augas prefondas, que nun se béien, mas que, na berdade, fáien andar las augas de l debenir houmano. Giente de carne i uosso, i giente cun Stória. Nó aqueilha que mos ansínan, cun guerras, heiróis, lhuitas, i muitas i muitas muortes. Mas ua stória de rostro humano, de sudor, de trabalho, de canseiras. Haberie que ler l ansaio “An torno al casticismo” ou la nobela “San Miguel Bueno, mártir” para melhor antender l’eideia unamuniana de intra-stória. Assi i todo, por outras palabras i cun outros heiróis, eiqui queda eilha nas palabras de l Padre Telmo Ferraz, screbidas an Picuote, por altura de l Natal de 1956.
NATAL
Nun hai gotas d’ourbalho.
La tierra stá seca.
La yerba stá branca.
Ls campos son un lhençol de friu. Adonde stá l’alma de ls campos?
I an que squina de ls lhumes de ls ouperários stá l Natal?
Ls casebres nun ténen chupones…
Por donde antrará l Nino Jasus?
Alhá drento, nun hai murilhos nien çapaticos! La chuçma anda çcalça.
Alhá fuora l manto branco cubre todo i pon mais friu l coraçon de las piedras.
Nun tenemos Eigreija! Nun tenemos campanas! Nun tenemos presépio!
La Missa fui nua sala grande… Bieno la Birge i troixo l Nino. Muitos ninos recebírun l Nino. An ne fin, semiu-se.
Quedei atordoado. Parguntei adonde bi lhuç i música:
─ Por eiqui nun passou.
Aflito, corri pa las barracas de l acampamento.
Cun miedo, bati a la puorta de la Mariana:
─ Biste l Nino Jasus?
─ Passou por eiqui i prometiu tornar.
Antrei an casa de l martelheiro Araújo, que ten ls pulmones çfeitos:
─ Stubo eiqui?...
─ Stubo i prometiu-me un presente!
─ Quando te l dá?
─ No Cielo.
Sali a correr. Passei por todas las barracas. El habie siempre acabado de salir.
Stafado, sentei-me nua piedra.
Senti un sgodar lebe. Era El…
─ Senhor! Tenie un bolho-rei para Ti…
Riu-se.
─ Cerrórun las puortas! Nun ténen chupones!
Di-les que guardo no Cielo todos ls presentes deste Natal
