La pruma braba
Las palabras (son cumo) selos que lhieban las pisadas de l passado: quando se refai l’ourige d’ua palabra tamien se puode refazer l camino stórico de la rialidade para donde eilha mos ambia, seia ua cousa, ua atebidade, un pensamiento ou un sentimiento.
Jan-Bart Gewland (1994), Pats in the Rainforests.
Ye própio de ls seres houmanos querermos saber cousas subre l nuosso passado. I la Stória ou, se quejirmos, la deciplina storiográfica, que naciu cun las crónicas ancomandadas puls reis i outros xefes de l mundo lhetrado, chegou a un tal nible que podemos pensar que ye la única capaç de mos lhebar a conhecer l nuosso passado. Ora la storiografie moderna tamien yá mos ansinou que la stória nun cunta propiamente aquilho que se passou. Çcuobre, recunta, refai. I al cuntar, ambenta, recria, cunta, siempre d’ua maneira ancumpleta i problemática, aquilho que se passou i yá nun eijiste.
I quei se passa cun ls pobos que nun ténen scrita ou que solo la tubírun hai pouco tiempo? La sue stória stá sujeita a la memória d’alguns. Ls que mais sáben, ls mais bielhos, ls mais respeitados. Stória i memória ándan de manos dadas. Mas ua quier saber i cuntar todo. Outra, porque nun ye anfenita, sabe que solo çquecendo alguas cousas puode ser capaç de guardar outras. Talbeç ls granicos mais pequeinhos, las recordaçones mais ambaranhadas. Mas son eilhas que le dan biba pois que, sendo mágicas, bíben no campo de l sagrado i nó de la “berdade stórica”. Apuis, son las lhénguas que fázen andar la ruoda de la memória puls caminos alegóricos de la stória andebibual i coletiba.
Ora, cada lhéngua ye ua biblioteca única. Las sues stantes stan chenas de tratados de gramática, mas tamien de botánica, de zoologie, de stória… i de todas las céncias que mos ansínan a cumprender l mundo i a cumprendermos-mos a nós mesmos. Las rezones para defender la dibersidade lhenguística son las mesmas se se tratasse de páixaros ralos, d’árboles ou de saberes i tradiçones çquecidas ou no camino de séren çquecidas. Las própias culturas maniféstan, na sue stética i nas sues cosmogonies própias, que la bariedade ye ua garantie d’adaptabelidade. Ua sola bariedade de fruita ye cousa mui buona i garantie de rendimiento. Mas basta un simples mosco, ua gilada ou ua zangarraina çconhecida para acabar cun todo i alhá se bai l lucro que julgábamos tener apedurado.
Fui a pensar nesta dibersidade i tamien no testo qu’eiqui screbi subre l’ourige de la palabra “patata” que dei cun un artigo Courrier Internacional, deste més, que mos diç que, nos montes de l Perú, se cultíban arrimado a trés mil bariedade de patatas. Diç tamien qu’un agricultor puode tener mais que trezientas, conhecéndo-las i çfrençándo-las pul sou nome: la que “fai chorar la nuora”, la “cuorno da baca”, “l’arpargata dura”, la “comida de nino para deixar de mamar…” Nun son nomes de ningua classificaçon “científica”, mas tan solo chamadeiros sculhidos puls labradores segundo l calatriç, la forma ou l gusto. Mas nestas tierras, a mais de quatro mil metros d’altidude, indas que todas las patatas téngan un chamadeiro, a las bezes alguas deixan de ser sembradas i pérden la sue eidentidade. Por isso, quando un agricultor torna a sembrá-las, ten l “dreito” de les poner un nuobo nome, batizándo-la a la sue moda.
Cunta este artigo qu’un agricultor, de nome Julio Hanco, puso a ua deilhas l nome de “puka Ambrosio”. “Puka” ye ua palabra quíchua que quier dezir bormeilho. I Ambrosio era l nome de l sou subrino que morriu por haber caído d’ua punte. Diç tamien que tenie l subrenome de Huahuasonqo que quier dezir “coraçon de nino”. Mas l que Hanco talbeç nun saba ye que l nome Ambrosio tamien quier dezir eimortal, pois que l’ambrósia era l manjar de ls diuses i la palabra ben de l grego “ámbrotos”, que quier dezir “que nun puode morrer”. Assi que, simbolicamente, las “pukas” que Julio sembra, dan fuorça i dan spessura a l’eiternidade d’Ambrosio, renacido an cada patateira i an cada patata que renace.
Tantas cousas que sabemos hoije an die! I tantas outras que cuidamos saber! La color de la tierra an Marte, quien son las pessonas mais ricas de l mundo, cumo se chama l filho de Ronaldo, sabemos todo de l nuosso IPhone… Mas cumo ye possible que sábamos tan pouco subre las “patatas” que comemos?
