La prum braba
“Ne l Éden nacie un riu que regaba l jardin, i apuis de debidie an quatro.”
Génesis, 2, 10
Ne ls últimos dies, por rezones bien conhecidas, muito se ten falado na palabra “quarentena”. Ora, cumo se sabe, esta palabra ye usada para falar de l tiempo que, por questones de salude, ua pessona debe de quedar sola para nun correr l peligro de pegar un bírus ou ua anfermidade a outro. Mas, an buona berdade, nun ténen que ser quarenta dies. Anton porquei se fala an “quarentena”?
La palabra debe la sue ourige a la prática que, ne l seclo XIV, por bias de la chamada Peste Negra, habie de poner i de deixar las pessonas solas antes de las deixar star cun mais naide. Parece ser q’esse era l tiempo que l’anfermidade s’habie de manifestar si s’houbisse yá cuntraído. La forma ben de “quarenta” i esta de l lhatin “cuadraginta”, cun perda de l “d” i de l “g” antrebocálicos i querie dezir “quatro bezes dieç”. Mas l númaro “quarenta”, tal cumo l “quatro”, ten raízes bien mais fondas na nuossa tradiçon i na nuossa cultura oucidental.
An eras mui antigas “quarenta” andicaba la plenitude, mas tamien l tiempo de la spera ou de l castigo. Son ls dies de l delúbio ounibersal, i ls anhos que l pobo judiu lhebou a chegar de l Eigipto a la Tierra Prometida. Mas, siempre segundo la Bíblia, fúrun tamien esses ls anhos que durórun ls reinados de David i de Salomon. I l própio Moisés fui chamado por Dius quando tenie quarenta anhos, quedando tamien quarenta dies ne l monte Sinai.
I haberá sido por toda essa stória q’an 1348, an Veneza, l goberno desse tiempo, quando la Peste chegou a la cidade, oubrigou las pessonas que chegában por mar a quedar quarenta dies ne ls barcos antes d’antrar na cidade.Cumo se sabe, l própio Jasus Cristo passou quarenta dies ne l deserto, sien probar la comida. I, por isso tamien, l’eigreiga pide (ou pedie) que, na Quaresma (
