A opinião de ...

La pruma braba

Ls Eiberos i ls Cántabros mátan-se atirando-se d’an riba d’ua peinha quando yá passórun l’eidade de fazer la guerra.”
Silius Italicus (III, 326-331)
Ampecemos por ua cunta:
“Era ua beç un bielho, yá malo i mui cansado i que tubo d’ir pa l monte. Era assi datrás, quando chegaba la hora de partir deste mundo.
L filho carregou algua cousa de comida para l pai comer durante uns dies i tamien ua manta para s’abrigar durante la nuite. Ls lhobos i l friu farien l restro de l trabalho. Era assi la fin de todos ls bielhos.
Quando chegórun al meio de l monte, i chegada la hora de la çpedida, l pai dixo al filho para rasgar la manta an dues i lhebar la metade. Mas l filho nun antendiu porquei i parguntou-le al pai para quei querie el la metade de la manta. El dixo-le q’habie de le serbir para quando el fusse bielho i l sou filho l lhebasse tamien pa l monte i l deixasse para ser comida de ls lhobos.
L filho ampeçou a pensar, agarrou ne l pai i troixo-lo para casa para tratar del até la muorte.”
Esta cunta, que muitos oubirien cuntada desta ou doutra maneira, lhieba-mos para tiempos mui antigos adonde, segundo se diç i se cunta, ls mais bielhos éran muortos ou ls própios se matában quando bien que nun éran mais q’un peso pa la família ou pa la tribo. Ls pobos i las gientes, oubrigados a andar de tierra an tierra, para fugir de ls einemigos ou para ancuntrar quei caçar i quei comer, tenien ne ls bielhos un peso defícil de lhebar.
Son alguns destes usos “bárbaros” que Strabon, na sue Geougrafie, mos cunta quando fala de ls pobos de l’Eibéria: “Muitas coisas a propósito de la falta d’hábitos i de l çprézio pu la muorte” (III, 18). Stá claro que, bistos de Roma, todos esses “hábitos”, fússen eilhes quales fússen, tenien que ser malos, para que la fuorça cebelizadora de ls remanos chegasse i amponisse las buonas maneiras.
Seia cumo fur, i indas que l respeito de ls mais bielhos fusse tamien ua prática – “[para comer] asséntan-se segundo l’eidade … bótan ls cundanados a la muorte d’ua faia i apedreian ls parricidas” (III, 3, 7) – la lhiteratura oural nun deixa scapar alguns desses usos, seia nas cuntas, seia na memória, seia na própia toponímia, algua deilha presente na Tierra de Miranda an nomes de Peinhas i Faias que deixan adabinar antigos ritos ou miedos.
Por isso, nun amporta nien ye possible saber se por trás destas tradiçones narratibas oubo ou nó práticas rituales ou cerimoniales desses usos “bárbaros”. Aquilho que mos diç Strabon subre ls bielhos i ls dolientes, q’alguns pobos peninsulares ponien a la borda de ls caminos para ancuntrar cunseilhos d’outros q’houbíssen tenido las mesmas maleitas (III, 3,6), cumparado cun outras narratibas d’outras ourigenes, mas tamien cun ls ritos de muorte de ls mais bielhos, ansina-mos que todos eilhes ténen l amportante papel de mos lhembrar q’essas práticas dében ser recusadas nas sociedades actuales. Las cuntas lhieban-mos assi pa l campo de la maginaçon, adonde las pulsones de bioléncia i d’arrependimiento scunjúran ls deseios i ls carregos mais fondos. Amostrando ua prática mala, dan ampeço a un nuobo sistema de balores, alhicerçado nua dialéctica antre ls “seniores” i ls “juvenes” presente an muitas tradiçones indo-ouropeias adonde dórun nacimiento a muitos mitos, cuntas, narratibas i lhonas. Por un lhado, ls bielhos, subretodo ls pais, represéntan la fuorça que deixan i transmíten atrabeç de la sangre; por outro, béien i ancóntran ne ls mais nuobos la fuorça bital, muitas bezes tamien guerreira, que çprézia la belheç i la muorte.
Nun tiempo an que muito se fala d’eutanásia (de l lhatin “euthanatos” i esta de l grego “euthanasía”, querendo dezir muorte doce), son estas alguas de las liçones – sien qualquiera motibaçon relhigiosa – que las cuntas i las tradiçones mos deixan. Anterrogando i parguntado se queremos tornar a esses tiempos “bárbaros” ou se somos, hoije, mais cibelizados que ls pobios antigos, oubrigados na nome de la tribo a abandonar ls mais bielhos al sou çtino.

Edição
3769