A opinião de ...

La Pruma Braba

“Cincuenta y un años repitiendo aquellas oraciones habían creado un automatismo que le permitía poner el pensamiento en otra parte sin dejar de rezar.”
Ramón J. Sender, Réquiem por un campesino español
“Réquiem por un campesino español”, de Ramón J. Sender, fui ua de las mies puortas d’antrada na lhiteratura espanhola. Lhembrei-me por estes dies deste lhibro i fui a saber del a la mie biblioteca. I alhá stan – cumo fago an quaije todos ls lhibros que leio - l die i la era an que l ampecei a ler: 06.04.1988. Yá fui ne l seclo passado, cumo se puode ber!
L camino de las lhembráncias fui abierto, penso you, pu las notícias que tubimos, nestes últimos tiempos, subre alguns anúncios d’obras antre Pertual i Spanha, i tamien subre outros projetos que, segundo fui lendo, han-de dar ua buona upa ne l sentido de mos tornarmos cada beç mais próssimos. Nada que nun seia buono. Nada que nun seia neçairo. Nada que nun seia amportante.
Mas apuis, lendo i oubindo outros comentairos, alhá se bai dezindo que muitas destas cousas yá fúrun apregonadas muitas bezes, q’alguas nun pássan de promessas, muitas bezes anunciadas i, por isso, outras tantas çquecidas.
I talbeç tamien por isso las mies lhembráncias me téngan lhebado, outra beç, a esta obra de J. Sender. Na berdade eilha ye un bun ancercício de lhembráncia. Un cura, Mosén Millán, purpara-se para dezir ls oufícios de réquiem por “Paco el del Molino”. Sentado na sancrestie, spera que chegue la giente. Mas naide aparece! Solo stan el i l sancristan. Al longe, antrando por ua ginela, oube-se l cabalhico de Paco, suolto pu l lhugar, correndo i lhembrando la muorte de l duonho. Anquanto reza, l cura bai lhembrando tamien la bida de l defunto, tenendo siempre presente las cousas de l’eigreija pu las quales Paco habie passado: l batizo, l crisma, la purmeira comunhon, l casamento i la strema unçon. Nesse antretiempo l sancristan, ancarregado d’abisar l cura de la chegada de giente a l’eigreija, bai cantando l remanse que las pessonas fazírun subre la muorte de Paco: “Ahí va Paco el del Molino / que ya ha sido sentenciado, / y que llora por su vida / camino del camposanto.” Apuis de muito aguardar alhá chégan trés pessonas. Son, por sinal, ls mais ricos de la tierra: don Gumersindo, don Valeriano i don Cástulo. Todos eilhes cun la mesma eideia: pagar la missa de “réquiem”. Mas l cura nun puodie aceitar. Ye que tamien el, indas q’amigo de Paco, el que l batizou i l casou, acabou por ousseliar a la sue muorte, dezindo l lhugar adonde staba scundido i lhebando a que fusse muorto sien outra rezon que nun fusse la de tener eideias própias. Ua muorte política, anjusta, adonde ls mais guichos s’aprobeitan para amponer las sues leis, aparecendo apuis delantre de l cura çpuostos a pagar la missa i assi lhimpar la sue cuncéncia.
Las lhembráncias son assi. Rius bien fondos que fázen presente l passado mais scundido. Beneiros que mos tráien a la lhuç de l die nuites apagadas, eras, tiempos, causos que yá nien maginábamos q’eijistíssen. Somos memória i somos oulbido. Ye neste baile antre l passado i l presenete que somos bida, que somos giente, que mos fazemos, que sabemos i dezimos quien somos. Ne l brebe tiempo de l “réquiem” por Paco el del Molino, Mosén Millán, l cura, tubo toda sue bida delantre del. L sou amor por Paco – a quien querie cumo se fura sou sou filho – mas tamien l sou delor por haber dito als “señoritos” adonde Paco staba scundido. Indas que prometira nunca l dezir a naide! Al fin de cuntas, nunca sabemos bien quien somos.
Mas l “Réquiem por un campesino español” trai-me tamien a la memória las “Cinco horas con Mario”, de Miguel Delibes. Ua biúba, Carmen, delantre de l cuorpo muorto de l sou tiu, Mario, bai-se lhembrando de la bida que passórun juntos. I nun son solo lhembráncias de las cousas de la bida. L siléncio de l muorto, las recordaçones, ls zgustos de Carmen por nun haber tenido l que querie tener, nien chegado adonde querie chegar, traien-mos tamien l tema de las “dues Spanhas” q’eiqui s’ancóntran i que se béien retratadas.
Notícias i lhembráncias. Lhembráncias de notícias. Pertual i Spanha mais próssimos. Pul IP2, pul IC5, la Tierra de Miranda mais acerca de Zamora, mais acerca de Madrid... Mas quei sáben ls pertueses de Spanha? Las guerras i lhuitas que, durante seclos, mos apartórun, deixórun subretodo un grande çconhecimiento. Quien sabe se nun será oucasion para que las stradas traian tamien un pouco de conhecimiento!

Edição
3802