“Nun le pareciu mal al barbeiro la maranha de l cura; i tanto assi que lhougo la punírun por obra.
Pedírun-le a la soteira ua saia i uas toucas, deixando-le an fiança ua sotaina nuoba de l cura.”
Miguel de Cevantes, D. Quijote de la Mancha (XXVII)
“L pagano ye criador cunsciente de ls sous diuses, anquanto que l crestiano solo ye ancunscientemente, i cumo sien querer.”
Fernando Pessoa, Páginas Íntimas e de Auto-Interpretação.
“La pruma ye lhéngua de l’alma.”
Miguel de Cervantes, D. Quijote (XVI)
“I na mesa de l miu quarto çcunchabado, ourdinário, ampregado i anónimo, scribo palabras cumo la salbaçon de l’alma i douro-me de l ponente ampossible de montes altos, lhargos i apartados.”
Bernardo Soares,
Libro de l zassossego
“Quando l miu cuorpo apodrecir i you fur muorta
Cuntinará l jardin, l cielo i l mar,
I cumo hoije eigualmente han-de beilar
Las quatro staçones a la mie puorta.”
Sophia de Mello B. Andresen, “Quando”
“Quando la lhéngua houbir dito todo, i calhado, siempre quero ber cumo iremos nós a bibir.” José Saramago, O Ano da Morte de Ricardo Reis
“La sola, absolutamente la sola memória de todo l oucidente durante seclos fúrun las Eitimologies de santo Isidoro.”
Mariano Arnal, Isidoro de Sevilla. Etimologías
Muitos son ls eisemplos de falsas eitimologies, d’eitimologies populares, ou simpresmente d’anganhos. Assi i todo, podemos dezir que todas eilhas ténen por prancípio l miedo de ls homes an deixar las cousas sin ningua splicaçon ou sien ningun sentido.
“Se falas a una pessona nua lhéngua q’eilha antenda, isso chega a la sue cabeça. Se falas cun eilha na sue lhéngua, isso chega al sou coraçon”.
Nelson Mandela
“Las lhénguas son speilhos de l anfenito.”
Claude Hagège, Halte à la mort des langues
Quando miramos pa ls grupos houmanos, i pa las lhénguas por eilhes faladas, hai ua cousa mui clara que se bei i que s’ampon: las lhénguas nun eijísten por eilhas solas, mas para i atrabeç de la giente que las fala, se sirbe deilhas, i las antreten na fala i na comunicaçon de todos ls dies.
